Seagems Norway AS løfta smaken i fem milliardar måltid i 2024

Restråstoff blir viktig ingrediens

Seagems Norway AS frå Ellingsøy ved Ålesund lagar smakstilsetningar som blir etterspurde over heile verda. Selskapet er spesialistar på å bruka restråstoff som ein ressurs til å laga nye smakar. Seagems Norway AS samarbeider med fiskarar og oppdrettarar for å få restråstoff som dei laga smakstilsetningar av og som vart selde til 37 land i 2024.

Blant kjøparane finn du nokre av dei største produsentane av matvarer i verda.

Meir utvikling og større sal med finansiering

–Salet vårt er globalt, og me driv kontinuerleg produktutvikling for å treffa ulike smakspreferansar rundt omkring i verda. Me forventar ytterlegare vekst i salet i 2025. Me har med finansiering frå Innovasjon Noreg, Sparebanken Møre og Eksfin  investert i større kapasitet til både utvikling og produksjon, seier Karl Inge Slotsvik, dagleg leiar i Seagems Norway AS.

Innovasjon Noreg og Sparebanken Møre har tidlegare finansiert Seagems Norway AS sine investeringar i nye anleggsmidlar.

–Eksfin kan tilby risikoavlasting for dei fleste garantiar bankar er villig til å stilla for kundane sine når norske selskap skal ut i verda. Du treng ikkje eksportera sjølv så lenge bedrifta leverer I ei verdikjede som fører til eksport, seier Kaare Haahjem, senior kundeansvarleg ved Eksfins kontor I Ålesund.