Næringsminister Vestre opnar nytt Stavangerkontor for Eksfin

Gir lokale bedrifter lettare tilgang til statleg eksporthjelp

Gjennom det nye distriktskontoret får lokale bedrifter endå lettare tilgang til Eksfins finansieringsordningar på 185 milliardar kroner. Regionen bruker allereie Eksfins ordningar aller mest i landet i samband med havvind-leveransar internasjonalt. Framover håpar Eksfin å hjelpe fleire bedrifter med å sikre eksportkontraktar, finansiere klimavennlege investeringar og vekse internasjonalt.

Gir auka eksport og tryggleik

Det er kritisk viktig at den spente internasjonale situasjonen ikkje rammar fastlandseksporten eller klimavennleg omstilling i industrien. Saman med Eksfin kan bedrifter og bankar dele meir risiko og reise meir kapital. Eksfins lån og garantiar sikrar kontraktar, aktivitet og arbeidsplassar i ei utfordrande tid.

Næringsminister Jan Christian Vestre

I dag klipte han snora på det nye Eksfin-kontoret i Stavanger sentrum saman med Eksfin-sjef Tone Lunde Bakker, Stavanger-ordførar Kari Nessa Nordtun og næringsforeiningar og eksportbedrifter i landsdelen.

Tilgjengeleg for små og mellomstore bedrifter (SMB)

Eksfins kunderådgivarar er bevisst lokaliserte saman med Innovasjon Noregs eksisterande kontor i byen. Det skal gjere det lettare for bedrifter i regionen å ta kontakt, møte begge verksemdene eller bli viste vidare:

Eksfin har eksistert i berre eitt år, og vi byggjer framleis kunnskap hos bedriftene om kva slags hjelp dei kan få hos oss. Gjennom distriktskontoret kan vi lettare nå ut til fleire bedrifter og ta ein kaffi med dei, Innovasjon Noreg, Nysnø eller lokale bankar. Eksportnæringane her endrar seg veldig raskt, og eg håpar vi skal vere tett kopla på behova og moglegheitene dei ser.

Eksfin-sjef Tone Lunder Bakker

Ho viser til at Eksfin allereie har eit regionskontor i Ålesund som blir styrkt med ein ekstra medarbeidar i desse dagar. I 2021 stod Vestlandet samla for over halvparten av all finansiering som Eksfin stilte det året. Dei viktigaste næringane var fornybar energi, maritim og verft og dessutan fiskeri og havbruk. Dette er næringar som står sentralt for bedriftene langs kysten – og for Eksfin.